MICROSCOPIO

Dunha roda chea de cor pasamos á elaboración dun "microscopio" moi peculiar que aportará á proposta de hoxe un extra de diversión e motivación. Para a súa elaboración precisarase:

• Unha fonte de vidro un pouco ampla
• Un vaso de vidro
• Unha culler
• Auga
• Colorante alimentario ou témpera
• Folios
• Rotulador

Para preparar a proposta, débese encher a fonte de vidro de auga, máis ou menos ata 1/3 da súa capacidade. Posteriormente, os/as peques deben botar dúas ou tres pinguiñas de colorante ou témpera e ir remexendo pouco a pouco coa axuda da culler ata que se disolva. O obxectivo é que a auga quede o máis escura posible de tal xeito que non se vexa o fondo da fonte, polo que, se non se lograra isto, deberán engadir máis cantidade de colorante ou témpera.

Precísase tamén elaborar unha serie de modelos de temática diferente: números, letras, formas e figuras, debuxos... nesta parte, poden colaborar tamén os/as peques. Non obstante, para que a busca sexa máis emocionante e non coñezan a disposición das letras, formas... recoméndovos que o faga un/ha adulto/a.

Os modelos son moi sinxeliños e non levará moito tempo a súa realización. Ademais, podedes acompañalos dunha folla de rexistro que servirá para que os nenos/as leven conta dos elementos que van atopando a través do seu microscopio. Este rexistro pode ser unha repetición dos modelos elaborados ou escrito, como o que vos ensino a continuación, máis idóneo para aqueles/as nenos/as que xa se iniciaron ou estanse a iniciar coa lectura.

Outra opción que podedes empregar para aproveitar como modelo son: as follas de revistas, os xornais, os cartóns das caixas que envolven algúns alimentos que conteñen debuxos e letras...

Unha vez teñades os modelos, débense ir colocando de un en un debaixo da fonte con auga coloreada. Os/as peques terán que coller o vaso e situalo dentro da fonte, pegando o fondo do vaso ao da fonte. A partir deste momento, deberán mover o vaso arrastrándoo pola fonte, sen levantalo e ir buscando as sorpresas que se esconden na escuridade da auga.

A actividade poderá dirixirse de diferentes xeitos:

- buscar números, letras, formas e debuxos dunha forma máis libre por parte do neno/a.

- tentar atopar as letras que forman o seu nome, o dos/as familiares, amigos/as..., as letras de palabras.

- relacionar o número que atopa con algo real, por exemplo: 4, como as patas do can.

- coller tantos obxectos que teña nesa zona como indique o número.

- escribir como se lee o número ou, ao revés, lendo o número e escribindo nunha folla a súa grafía.

- buscar os debuxos e xogar a inventar breves historias.

- anotar o nome dos debuxos segundo o nivel de escritura.

- realizar un conteo dos elementos atopados.

- pasar o nome dos debuxos de singular a plural.

- engadir un adxectivo aos obxectos.

- elaborar unha frase coas palabras ou debuxos atopados...

Como vedes, son varias as opcións que ofrece. Podedes probar con varias ou repartilas se a proposta resulta divertida e motivadora!

Feliz mércores!