RODA DE COR

A proposta de hoxe ten como finalidade afondar un pouquiño nas cores primarias, cores que non se poden obter a partir da mestura de ningunha cor, así como no resultado da mestura destas cores e que da lugar ás denominadas cores secundarias. Para facer a proposta un chisco máis visual e diferente para os/as peques, propóñovos realizar unha roda de cor.

 Para levar a cabo a roda simplemente ides a precisar: 

• Témperas ou colorante alimentario de 3 cores: vermello, azul e amarelo.
• 6 recipientes pequenos, tapas... preferiblemente transparentes ou con fondo branco para percibir mellor as cores resultantes.
• Un instrumento para mesturalas cores (pincel, bastoncillo...)

Os pasos a seguir son moi sinxelos:

PASO 1. AS CORES PRIMARIAS. O primeiro paso será centrar a atención dos/das peques nas cores primarias, é dicir, nas cores azul, vermello e amarela. Para iso, pediráselle aos/ás peques que coloquen os seis recipientes/tapas formando unha roda ou círculo e deberán engadir en tres dos recipientes/tapas un pouquiño de cor vermella, un pouquiño de cor amarela e un pouquiño de cor azul. Entre cada cor deixarase un recipiente/tapa baleiro. Podedes comentarlle aos/as peques que esas cores que están a engadir son as que se coñecen como cores primarias e que estas cores non se poden obter a partir da mestura doutras.

PASO 2. AS CORES SECUNDARIAS. Unha vez teñan na roda as cores primarias, chega o momento de encher aquelas que quedaron baleiras. Como? Pediráselle ao/á peque que ten que verter na tapa baleira, outro pouquiño de cada unha das cores que ten a ambos lados da tapa. Unha vez vertido, remóvese con moita delicadeza. Pouco a pouco irá percibíndose unha nova cor e repetirase o proceso cos outros dous recipientes/tapas. Estas cores coñécense como secundarias e son cores que se obteñen grazas a mestura das cores primarias. 

VERMELLO + AMARELO= LARANXA

AMARELO + AZUL= VERDE

AZUL + VERMELLO = MORADO

Déixovos un vídeo con todo o proceso:

Moi doado, verdade? Chegados a este punto a roda de cor estará lista para usarse!

PASO 3. CREACIÓNS. O último paso será o de experimentar coas cores primarias e secundarias sobre o papel. Propóñovos as seguintes opcións ao respecto:

- Pintar un cadro de xeito libre empregando tódalas cores da roda, primarias e secundarias

- Pintar un cadro soamente coas cores primarias

- Pintar un cadro soamente coas cores sencundarias

- Observar as creacións: que nos transmite cada un dos cadros e as súas cores?

- Poñer un título a cada obra.

Bo día a todos/as!